Everything Happens For A Reason 5 "الحياة و الموت"

مش مصدقة انه عدت سنة...سنة بحالها بحلوها و مرها...سنة على اول تجربة حزن حقيقية في حياتي

في يوم زي ده من سنة و في الساعة اللي انا بكتب فيها النوت دي انتي كنتي لسه عايشة..كنتي لسه بينا

لو كنا نعرف وقتها انك بعد ساعات مش هتبقي بينا كنا قضينا جنبك كل ثانية فاضلة من حياتك
بس الحمد لله على كل حاجة...انتي في مكان ارحم بكتير..انتي عند ارحم الراحمين

اوعي تفتكري اننا نسيناكي...ابدا ..و لا عمرنا هنساكي و لا عمرنا هنتعود على غيابك...بنفتكرك و احنا فرحانين ..بنفتكرك و احنا زعلانين..بنفتكرك لو كلنا متجمعين و بناكل اكلة كنتي بتحبيها... بنفتكر كلامك و مواقفك المضحكة ...بنشوفك في ولادك
كلنا فاكرينك و بندعيلك
جدتي بشوف دموعها في كل صلاة...مبتعرفش تخبي و مبتقولش بدمع ليه..بس انا عارفة
ماما ما بتعرفش تخبي دموعها..ما انتي عارفها...و كل ما بتتكلم عنك بلاقي دموعها سابقة كلامها
و انا بكتبلك و مش قادرة ما ابكيش....بصراحة وحشتيني و مفتقداكي اوي و اللي بيقولو الوقت بينسي بيكدبوا او ما عاشوش الحزن اللي انا عشته..او ما حبوش حد اوي كده
اه الحزن بيخف شوية بس عمره ما يتنسي
في السنة دي عدت حاجات كتيرة يا حبيبتي..
أحكيلك؟...
ماشي هحكيلك عشان انتي بتحبي الرغي..مش عارفة انا طلعت شبه مين في الحكاية دي
ما علينا...السنة دي يا خالتو مكنتش حلوة اوي على العالم..ابتدت بدم و موت اول يوم فيها كان حزين
معرفناش نفرح اوي السنة دي...كنا بنحزن لما الناس كانت بتموت في تونس و مصر و اليمن
بس فرحنا لما الشعب عمل ثورثه بايده و حقق اللي نفسه فيه
و لسه زعلانين على اللي بيحصل في ليبيا و سوريا
ربنا يستر و السنة دي تعدي او تخلص بأقصى سرعة...اصلها بجد سنة صعبة اوي على الناس كلها
اللي حصل عندنا في العيلة عادي ...مرض جدتي و كل فترة تتعب اكتر و ترجع تتحسن...ربنا يشفيها
الخبر الحلو انه بنوتك نجحت و هتروح اعدادي السنة الجاية
ماما و خالاتي و اخوالي بخير يا حبيبتي...و كلهم بيدعولك و فاكرينك و بيحبوكي

الموت ده سنة الحياة.....بيحزنا و بيوجعنا فراق اللي بنحبهم بس مؤمنيين اننا كلنا هنموت..مهما اتوجعنا عارفين انهم عند اللي خلقهم واللي هو احن عليهم من اي حد


اللهم بيض وجهه يوم تبيض الوجوه وتسود وجوه اللهم يمن كتابه .
اللهم وثبت قدمه يوم تزل فيها الاقدام . اللهم اكتبه عندك من
الصالحين والصديقين والشهداء والاخيار والابرار . اللهم اكتبه
عندك من الصابرين وجازه جزاء الصابرين


ٍاللهم اني اسالك باسمائك الحسنى وصفاتك العليا وباسمك الطاهر
الاعظم ان تتقبل منا دعائنا بقبول حسن وان تجعله خالصا لوجهك الكريم


ربنا يرحمك يا خالتي يا حبيبتي

***********************
من نعم ربنا علينا..اننا مش عارفين هنموت امتى..عشان كده بيخلينا نحب الحياة و نعافر فيها عشان نعيش كل ثوانيها
مهما عملت فينا بتلاقينا ماسكين فيها يادينا و أسناننا....لسه عايزين نعيش ..لسه عايزين نعمل حاجات كتيرة
لسه عايزين ندرس ..لسه عايزين نشتغل...نحب..نتحب..نجرب...ننجح..نخسر
طول ما جوانا نفس
طول ما ما انا بتنفس بحس بالامل...بحس ان بكرا هيكون اجمل..اكتر حاجة بحبها في الدنيا دي الشروق...حبي للشروق زي حبي لطفل لسه مولود..الاتنين بيدوني امل كبييييييير اوي
امل و فرحة و سعادة مبعرفش اخدها بالكم ده غير من شروق شمس يوم جديد..و و لادة طفل..و ده اللي مفرحني الفترة دي
طفل جديد في عيلتي...طفل استنيته من اول ما كان نطفة..لحد ما اتكون و جه للدنيا و اتسمى سعد..و كان سبب سعد و سعادة كل اللي حواليه...طفل بيخليني في منتهى السعادة طول ما انا جنبه
هو انا مقلتلكيش يا خالتو..مش اخوكي جاب ولد من كام يوم ..هما بالظبط من 22 يوم
سعد طفل جميل اوي ما شاء الله عليه لو شفتيه هتحبيه اوي
و سبحان مغير الاحوال..الفترة دي من السنة اللي فاتت كانت كلها حزن...بس السنة دي كلها افراح و مناسبات سعيدة...بس صدقيني مش ناسينك

عارفة...ربنا كريم اوي و رحيم اوي ..بياخد مننا ناس بس بيدينا ناس تانية
و بيفرحنا بيهم ..و برضه بيخلينا نفتكر اللي سابونا و احنا فرحانين و مبسوطين انهم عنده...ما احنا امانة ربنا وزعنا في الارض و هيجي اليوم اللي هيسترد امانته...و يجيب ناس بدلنا
الحمد لله على كل شيء

اهم حاجة ان الانسان يؤمن بانه اتوجد في الحياة عشان مهمة..فا لازم يعملها على اكمل وجه..عشان يوم ما يقابل وجه الكريم يكون راضي عنه
اللهم احسن خواتمنا...و ارحم احيائنا و موتانا


وحشتيني و بحبك اوي
Emy: 12.07.2011

A Lifetime Memories| موازين و عمرو...و حكاية حب من القلب

من يوم الحفلة و انا بحاول اكتب اي كلمة عن ذكرى واحدة بس شيلتها في قلبي من حفلة موازين شايفة الناس كلها بتنزل و تكتب و انا الوحيدة اللي ساكته..رغم انهم لو عرفو اللي في قلبي هيعرفو اني اكتر انسانة في الكون ده انبسطت في الحفلة دي
حاسة ان صفحات كتيرة اوي مش هتكفيني و لا هتعبر عن اللي جوايا من حب و تقدير لفن الراجل ده عمرو ديابمش عارفة اوصف بجد احساسي و انا لاول مرة بشوفه و بسمعه لايف..حسيت و كإني فعلا أول مرة أسمعه قي حياتي....صوته فيه سحر غرييب..ياخدك معاه و تسرح فيه و كانك حقيقي بتسمعه لاول مرة
.احساس اول مرة ده حاجة تحفة اوي...حاجة انا لسة مش عارفة اوصفها...حسيت اول ما قال "قدري اختارلي اكون ليها" ان اللي سمعته منو في حياتي كوم و الجملة اللي ابتدى بيها الحفلة كوم تاني خالص..حسيت اني بحلم..مكنتش حاسة بالناس اللي حوليا بسمعه هو بس مستمتعة لاقصى الحدود..بس لقيت نفسي بغنييي بأعلى صوتي و بنبسط و أهيص..دمعت في اغاني ليها ذكريات معايا غنيت من قلبي و ضحكت من قلبي ..بقالي كتيييييير محستش بسعادة حقيقية كده..باختصار..أنا بحب الراجل ده

بحبه و بشكره انه خلاني مبسوطة.بعد يوم 28/05/ لقيت نفسي انسانة تانية ...انسانة فرحانة و حابة كل حاجة حواليها
مش عارفة ليه و لا ازاي ؟؟ بس حقيقي لو في شخص ممكن يخليني طايرة من السعادة بعد اهلي و صحابي فا هو عمرو دياب



الحفل كان بجد مميز...كل حاجة فيه كانت عاجباني من اول الامن المشدد اللي بجد خلا الواحد يدخل و هو مطمن جدا
للناس اللي حضرت..اللي عجبني بجد انواع الناس..من كل الفئات العمرية..اينعم اغلبهم شباب بس كان فيه ستات كبار و رجالة و اطفال..و كانت جنبي واحدة ست جاية هي و جوزها و بنتها الصغيرة....بنوتتها مبسوطة و بتقول عمرو دياب و كانت عمالة ترقص في كل الاغاني

صورتها الصورة دي قبل ما الحفلة تبتدي




الجو العام للحفلة كله كان تحفة بجد..انا اتفرجت على موازين 2008 بس المرة دي حاجة تانية خالص
و احلى بكتير من 2008 و لا جايز عشان انا حضرت الحفلة دي حاسة انها احلى حفلة في الدنياااااااااااااا
ياااااااااه...بجد بجد انا مش لاقية كلام اقوله رغم كتر الكلام اللي جوايا


اول ما عمرو قال اول جملة من اصلها بتفرق مكنتش مصدقة نفسي...مش مستوعبة اني فعلا بسمعه و شايفاه قدامي..كنت عايزة اصور اول لحظة اشوفه فيها..و فعلا مسكت نفسي و صورته ..و طبعا الفيديو طلع فضيحة..اصوات غريبة بتغني و بتهيص بس كانت حلوة...بلاقي نفسي بتفرج على الفيديوهات اللي انا صورتها 100 مرة في اليوم و بحس كإني لسه في الحفلة

اكتر حاجة بسطتني ان الكل كان عارف الاغاني قبل ما عمرو يغنيها كبار و صغيريين...كنت براقب الناس بشكل غريب..محدش واخد باله من حد كله مركز مع عمرو..و انا مركزة مع كله + التليفونات
..كانت ليلة عجيبة جميلة ..ليلة من عمري بجد..ليلة مش هعيش الفرحة اللي عشتها فيها تاني..او لو عيشتها مش هتبقى بنفس الطعم

ده اللي كان نفسي فيه مو عمرو بيغنيها بجد بجد حسيت ان عيني جت في عنيه اه والله و عارفة ان محدش مصدقني..بس انا كنت قصاده على طول و هو بيغنيها

بعد اصلها بتفرق بقا نيجي لقمريين الاغنية اللي بعشق الكمنجة فيها...و يحيي الموجي الجميل ...من الاغاني اللي بموت فيها و خصوصا لايف..
بجد كل غنوة غناها حبيتها مليون مرة اكتر عن ما كنت بحبها قبل كده

و لا على باله
يهمك في ايه
نقول ايه
كله الا حبيبي
وياه
الميدلي الي كلنا حافظينها و بنحبها
ضحكت ..الللادي
اما تملي معاك بقا..فا دي حطيت ايدي على خدي و فضلت اسمعها و ابص لعمرو..و طبعا صاحبتي كانت بتصور عشان ميفوتنيش الفيديو ده" اصلي استغلالية"..انا استمتع و المسكينة تصور

ميااااااااااااال...طول عمري بعشق عمرو في ميال.....بعشق تفاعل الجمهور معاه...و هو بيقول لكل حته يقولو معاه ميال و يشوف مين بيقولها بقوة...يااااااااه انا عملت كده انا قلت ميال بأعلى صوتي
احم.. و طبعا صوتي راح اخر الحفلة

عيني و انا شايفه...تعبته؟؟ لاااا ..تعبته لا ؟؟ انا مش ورايا حاجة الليلة... الراجل ده عنده لياقة بدنية مش موجودة عند اجدعها شاب في العشرينيات..يا لهوي بجد يعني..ما شاء الله عليه ربنا يحفظه
الغنوة دي بتولع اي حفلة..ما شفتش حد واقف في مكانه و هي بتتغنى



لما غنى كوبليه من ناس بتحب قبل ولا على باله الناس كانت بتبصل بطريقة حلوة اوي...انا بصيت كده حوليا و عيني راحتله بعدها..حسيت اني عاملة زي الايكون ده

بس عيني دمعت و كنت بصورة و عملت زوم ياااه بجد على احساسه

و خلصت الحفلة بأصلها بتفرق برضه و كان نفسي متخلصش
انبسطت اوي اوي اوي اويييييييييييييييي

و انبسطت اني صورت عمرو و هو خارج

دي شوية صور

ده الاستيج قبل الحفلة











لما الفرقة طلعت




عمرو

يوم الحفلة كله كان بوم جميل اوييييي.....اول ما شفت عمرو انا نسيت تعبي و نسيت اني جيت 700 كيلمتر عشان احضر الحفلة
تقريبا نسيت انا مين وقتها...انا بشكرك يا عمر يا دياب..بشكرك انك خلتني اعيش واحد من اسعد أيام حياتي...بشكرك عشان خليتني اشوف ناس ديابية حبيتهم أوي

بشكرك بجد


A Live concert.. Was A Dream to Reach...i just can't believe that the Dream Is True Now <3..yesss ..i was there..i saw him <3 i danced & sang with Him <3 Wooow...i said wooow when i saw him on The Stage..i Love you Amr Diab
***************************************************************

خلصت الحفلة و رحنا انا وو يدي و صاحبتي و 2 صحاب ويدي ندور على مكان ناكل فيه بس ملقيناش غير سلطة..و كانت احلى سلطة اكلتها في حياتي
ميرسي يا ويدي على السلطة
*******************
تاني يوم الحفلة قابلت ناس من اجمل الناس
فرقة عمرو دياب
بجد ناس عسل اوي ..قعدت معاهم كتير و اتصورنا و رغينا كتييييييييييير اوي
رغينا في حاجات كتييرة
اكتر ناس قعدت معاهم ..يحيي غنام و عمرو طنطاوي و مهندس الصوت هشام الرفاعي
يحيي غنام..عسل الراجل ده..كنت بحبه او و لما اتعرفت عليه حبيته اكتر و أكتر...موتنا من الضحك دمه زي العسل
عمرو طنطاوي حسيت انه هادي ..بس جمييل اوي هو كمان و عسل
هشام الرفاعي..بقيتنا صحاب كويسن انا و هو و بجد شخصية جميلة اوي و محترمة
تامر الزوئيبي ..عسل و طويل اوي...هههههه..قلت مستحيل اتصور معاك واقفة يا تامر

احمد ربيع الدرامزاوي المبدع
و عاصم فوزي و حسن الحلو
و استاذ يحيي الموجي الجمييل
و اشرف و علاء ..هههههههه و ناس كتيرة اسفة لو نسيت حد بجد كلهم عسل و فرحت اوي لما عجبهم تذكار اديتهلهم

Amr tantawy..yahya ghanam ..Hisham el refaie






from hisham to me












from Amr tantawi






From My besttttt Yahya ghanam














انا بجد شلت في قلبي ذكريات للعمر كله من الحفلة دي و مش هنسى اي حد قابلته



شكرا بجد لكل اللي خلاني افرح اوي يوم 28/مايو و 29
شكرا محسن شكرا لانك صديقي
وليد ربنا ما يحرمني منك
ويدي حسنا حفيظ رضا..حقيقي انبسطت اني شفتكم
ويدي بالذات ميرسي على كل حاجة..ميرسي انك في حياتي يا الذ سلطة انتي

تاني مرة..شكرا عمرو دياب لكونك ببساطة عمرو دياب واحد في الدنيا دي